الجنوساني: ردم الساحل جعل الأسماك تهجر مصائدها

الجنوساني: ردم الساحل جعل الأسماك تهجر مصائدها

جنوسان - محمد الجدحفصي

قال البحار الحاج أحمد الجنوساني، إن الصيد قديما كان وفيرا بالأسماك، إلا أن التعدي وردم السواحل قد جعل الأسماك تهجر مصائدها، الأمر الذي ساهم بشكل كبير بما يشبه انقراض أنوع كثيرة من الأسماك، «الوسط» حاورت الجنوساني عن البحر قديما وحديثا في جنوسان:
شخبارك حجي أحمد؟
- زين والله.
انت تبيع سمج من متى؟
- أبيع والله من يوم عمري 20 سنة.
والحين عمرك كم؟
- عمري يمكن 64.
يعني أنت بحار وبيّاع؟
- إيه بحار وبياع، إلا نصيده نبيعه.
في بحر جنوسان تبحر؟
- إيه في البحر هنيه.
كنت تدخل ويا من؟
- أدخل الأول ويا أبويه.
وتتذكر البحر شلون كان شكله قبل؟
- إيه.
أنزين، تقدر توصف لنا شكل البحر الأول؟
- البحر الأول زين، تصيد سمج صافي، السمك كله كان موجود، روبيان، الحين حتى روبيانة ما نصيد من الحضور.
انزين أتبيعه هنيه أنت مكانك؟
- لا، الأول انوديه جدحفص.
والحين ما توديه؟
- لا لا، الحين ما نوديه هي 3 سنين، الحين ما فيه صيد ولا شي.
ما فيه صيد كلش؟
- ايه الصيد الحين خفيف، 4 كيلو 5 كيلو 10 كيلو، الأول نصيد لينا ثلاجتين أو ثلاث نوديها جدحفص، نوديها المركزي، الحين من صار الدفن خلاص.
يعني الدفان هو اللي شرّد السمج؟
- ايه، هكو التكات (الشاحنات) تنجل، تدفق الرمل تلقف السمج، تشيل من محل وتحط في محل.
انزين وتدخل بالكاري يعني لو هذا بس لبيع السمك تستخدمه؟
- ايه بالكاري.
تستخدمه بس في البحر لو اتبيع به أقصد؟
- لا لا، بس ادش به البحر.
تروح إلى وينه به يعني؟
- للحضور، شي قرب للحضور وشي للحضور بعد، ندخلهم الحضور، ندخل الكاري في الحضرة.
انزين تشيل السمج وترد ترجع؟
- ايه، انصيد السمج ونرجع.
يعني بعيد عليك إذا تروح، وليش ما تستخدم طراد؟
- لا فيه طراد صغير بس، عندنا حضرتين غزار وفشت فيهم فالحمارة ما تروح، نروح بالطراد، طراد صغير.
بس الحضور القريبة تروح بالكاري؟
- ايه بالكاري، ندخل داخل.
وشنو أنواع السمج الموجودة عندك؟
- نيسر، وساعات نصيد صافي، ساعات نصيد بياح، كيلوين ثلاثة بياح، وساعة ربيب جم كيلو ربيب، أمس حصلنا يجي أربعة خمسة كيلو ربيب، اليوم حصلنا كيلوين بياح.
والأسعار في شهر رمضان تختلف عن قبل؟
- لا، الأول شهر رمضان رخيص السمج.
والحين؟
- لا، السنة زين يعني. السنة زين، بس ما فيه صيد ولا في سمج زين بعد. سمج زين ما فيه، مال شهر رمضان ما ميش.
السمجة تعبانة يعني؟
- لا، صغار، مو تعبانة صغار. هو زين في المأكل بس ما يعجبهم ألحين إلا الصافي، الشعري، الهامور.
يعني هذا النوع من السمج ما أحد يبغيه؟
- من ويه، يمبونه، بس على خفيف يعني، مو كل من جا ياخذه يعني. والله البحر الأول تمام ألحين هكو يدفنون فيه، هكو التكات (الشاحنات) تنجل.
أنت عندك جم ولد صاروا بحارة؟
- كلهم، عندي 9، 2 يشتغلون مدرسين وواحد مدرس بس بعده ما حصل شغل. كلهم دارسين بس كلهم في البحر. بس 2 الا هو عباس ونصر هذيلين ما يروحون البحر.
مشكورين يا حجي...
- الله يسلمك.


صحيفة الوسط البحرينية - العدد 2906 - السبت 21 أغسطس 2010م الموافق 11 رمضان 1431هـ