صحيفة نبض الشعب الاسبوعيه رئيس التحرير جعفر الخابوري

كل اللي محتاج تعرفه عن الغواصة المفقودة في المقال ده

الغواصة الصغيرة اللي قدامك في الصورة دي أصبحت القبر الصامت الأخير لمجموعة من أهم وأغنى رجال الأعمال على الكوكب، اللي بقالهم 4 أيام مفقودين في أعماق المحيط، بعد ما كانوا بيحاولوا يزوروا حطام سفينة تايتانيك الغارقة!!

الغواصة دي يا سيدي اسمها (تايتان Titan)، وهي تابعة لشركة اسمها Ocean Gate.. ودي شركة متخصصة أصلًا في الرحلات السياحية اللي زي دي، وبتاخد الناس في رحلات غوص على أعماق مرعبة فعلًا بتوصل لعشرات الكيلومترات، عشان يشوفوا أعماق المحيط وبقايا السفن الغارقة.. وسعر تذكرة المقعد الواحد على الرحلة بيوصل لأكتر من ربع مليون دولار!

الناس اللي على متن الغواصة بقى هما رجل الأعمال البريطاني الباكستاني شاهزادا داوود، ومعاه ابنه سليمان داوود.. ومستكشف بريطاني وملياردير مشهور اسمه هاميش هاردنج، وده بالمناسبة هو نفس الشخص اللي كان على متن رحلة Blue Origin السياحية اللي سافرت لحدود الفضاء من قريب، بصحبة جيف بيزوس مؤسس أمازون..

والاتنين التانيين هما غواص سابق من البحرية الفرنسية اسمه بول هنري، والرئيس التنفيذي أو ال CEO لشركة Ocean Gate نفسها المسئولة عن الغواصة والرحلة، اللي هو (ستوكتون راش)..

طب تمام.. أيه بقى اللي حصل بقى بالظبط؟!

اللي حصل يا سيدي هو انه من حوالي 4 أيام كده، وتحديدًا يوم الأحد الصبح، الغواصة دي بدأت رحلة سياحية جديدة لأعماق المحيط الأطلنطي، عشان تزور حطام السفينة الأشهر في التاريخ (تايتانيك).. والمشكلة ان الرحلة دي كان بقالها فترة بتتأجل عشان سوء الأحوال الجوية، لحد ما قرروا انهم هيبدأوا الرحلة أخيرًا بعد ما الجو هدى شوية كده..

وفعلًا بدأوا ينزلوا في قلب المحيط لعمق سحيق جدًا مستحيل تقدر تتخيله.. يكفي اني أقولك ان حطام تايتانيك موجود على عمق حوالي 4 كيلومتر تقريبًا، يعني ما يعادل طول 4 أبراج خليفة محطوطين فوق بعض! ولو دار في ذهنك هو ايه نوعية المادة اللي ممكن تتحمل الضغط على عمق زي ده، فخليني أقولك ان الغواصة دي أصلًا مصممة للوصول لعمق 6 كيلومتر كاملين!

والمفاجأة هي ان اللي صمم الغواصة دي أصلًا هو وكالة ناسا في مختبراتها الخاصة، وتم تصنيعها من ألياف الكربون شديدة التحمل، ومعدن التيتانيوم.. والتكنولوجيا اللي تم بناءها بيها دي هي نفس التكنولوجيا اللي بتتصنع بيها مركبات الفضاء اللي بيتم اطلاقها للكواكب الأخرى، وقادرة على تحمل ظروف بيئية لا يمكن تخيلها!

بس المشكلة بقى هي ان اعماق المحيط هي واحدة من أخطر الأماكن الموجودة على الكوكب حرفيًا، والظروف البيئية اللي فيها أشد خطورة من الكواكب الأخرى.. وده عشان الضغط على الأعماق دي حرفيًا قادر انه يسحق العضم نفسه، ده غير البرودة الشديدة اللي بتوصل لدرجات التجمد، وكمان الضلمة الحالكة بسبب عدم قدرة ضوء الشمس على الوصول للأعماق دي.. يعني المنظر هناك فعليًا هو أقرب لشكل الكواكب الأخرى اللي على أطراف المجموعة الشمسية، ومرعب لدرجة عقلك ميتصورهاش..

وهو ده بالظبط بقى الموقف اللي فيه الخمسة دول بقالهم 4 أيام!!

الغواصة بتاعتهم بدأت النزول للأعماق في صباح يوم الأحد اللي فات، وبعد ساعة ونص من بداية رحلتها، وتحديدًا الساعة 11:47، انقطع الاتصال بينها وبين السفينة الأم اللي نزلتها للبحر!! ومن ساعتها بقى ولحد اللحظة اللي انت بتقرأ فيها السطور دي، وهما بيحاولوا يدوروا عليها ومسحوا المحيط كله تقريبًا بحثًا عنها، ومحدش لاقيلها أدنى أثر!

المشكلة بقى ان الأكسجين الاحتياطي اللي معاهم المفروض يكفيهم حوالي 70 ساعة تقريبًا، لو رشدوا استهلاكهم.. ومفيش معاهم أكل ولا شرب ولا أي وسيلة اتصال أو GPS، عشان كل الحاجات دي مش بتشتغل اطلاقًا على الأعماق دي.. ووسيلة الاتصال الوحيدة بينهم وبين السفينة الأم هي الرسايل النصية اللي بتشتغل فقط لما بيكونوا تحت بعض مباشرة!

الغواصة من جوه زي ما انت شايف في الصورة في أول كومنت كده ضيقة جدًا لدرجة انك متقدرش تقف فيها براحتك، ولازم تقعد مقرفص، ومفيهاش غير شباك واحد من قدام في المقدمة، هو اللي بتتفرج منه على المشاهد اللي انت نازل تشوفها.. وهي مقفولة من بره بمسامير محكمة ومينفعش تتفتح من جوه بأي شكل، ولازم عشان اللي جواها يخرج، يكون في فريق ييجي ويفك المسامير دي من بره بمعدات خاصة عشان يخرجهم..

الفكرة بقى ان السلطات بقالها كذا يوم بتدور عليهم، والإعلام العالمي كله بيتكلم عن الموضوع تقريبًا من يوم الأحد.. وكانوا قايلين ان اخر فرصة ممكن يتم العثور فيها عليهم أحياء، هي صباح يوم الخميس اللي احنا فيه ده! بعد كده فرص نجاتهم شبه معدومة! ولك ان تتخيل بقى لما 5 مليارديرات زي دول يموتوا ف يوم واحد في حادث زي ده من شركة كبيرة زي دي، وجوه غواصة شاركت في تصميمها وكالة ناسا نفسها، ممكن الموضوع يقلب الدنيا كلها ازاي!

وعايزك بس تتخيل نفسك كده في الموقف المرعب ده.. محبوس بقالك 4 أيام في مكان ضيق ومضلم أقرب للقبر، في أعماق المحيط، ومعاك 5 أشخاص بدون أكل ولا مية، ولا حتى مساحة تتحرك فيها! ده غير البرد الشديد اللي بيكون موجود على عمق زي ده، واللي مفيش أي وسيلة تدفئة تقدر تخفف منه.. غير شعور الاختناق بسبب نقص الأكسجين المستمر، والهلاوس اللي بتحصلك بسبب نقص الأكسجين الواصل لمخك!

يا ترى الناس دول شافوا أيه في أعماق الضلمة هناك، وعاملين ازاي دلوقتي لو لسه عايشين أصلًاش؟! يا ترى حاسين بأيه، وشافوا أيه في لحظاتهم الأخيرة، وهل فضلوا ثابتين وبعقلهم ولا اتجننوا وعملوا حاجة في بعض ولا قتلوا بعض ولا حتى أكلوا بعض من الجوع وهما تحت؟!

الله وحده أعلم!

هفضل دايمًا عند رأيي ان قصص الغرق والفقد في المحيط هي أكتر قصص مخيفة ممكن تسمعها، وان المحيط هو أكبر كابوس موجود على ضهر الكوكب تقريبًا، واللي لسه لحد دلوقتي منعرفش عنه أي حاجة، لدرجة انه مجهول بالنسبة للعلم أكتر من الفضاء الخارجي!! ومحدش يتمنى أبدًا يكون في موقف الناس دول ولا يحصله اللي حصلهم..

والأغرب بقى من كل ده، ويمكن أغرب حاجة في الموضوع كله، واللي لازم تخلي عقلك يتسائل وخيالك يسرح، هو الصدفة اللي تخلي غواصة اسمها (تايتان Titan) تختفي وتغرق وهي بتدور على سفينة غرقت من قرن تقريبًا، اسمها تايتانيك Titanic!

ملاحظ مدى تشابه الإسمين؟!

تايتان - تايتانيك!

هل دي صدفة فعلًا، ولا الإسم ده في نوع معين من النحس الخارق اللي بيتجاوز حدود المنطق والطبيعة نفسها، وبيسبب الكوارث لكل اللي يستعمله في المنطقة دي بالذات؟!

هسيب الإجابة لخيالك.. وفي النهاية متنساش تعمل شير وعرف غيرك بالموضوع، وان شاء الله هتابع معاكم تطورات الموقف أول بأول، وهنشوف مع بعض هيتم الإعلان عن أيه خلال الساعات الجاية..

ربنا يحفظنا جميعًا..