مجلة صور واخبار الاسبوعيه رئيس التحرير جعفر الخابوري

فكرة من خارج الصندوق للصديقة العزيزة: Shereen Haseeb جديرة بالمناقشة على أوسع نطاق من النواحي الدينية والقانونية والمجتمعية ...
ولنبدأ مناقشتها من الأن، وهنا على هذه الصفحة لو أردتم ...
================================================
النموذج الغربي في علاقات الحب والزواج ...اتنين بيحبوا بعض ، قرروا يعيشوا مع بعض ويتشاركوا الحياه بأعباءها وتفاصيلها ..اهلهم عارفين وموافقين المجتمع كله عارف وموافق، هما بيشتغلوا وبيكونوا نفسهم بهدوء وبقدراتهم ..سواء كانت سريعه او بطيئه سواء كانت قدرات تسمح ببيت بتمويل عقاري، او شقه مفروشه علي الاد ...مش هتفرق المهم ده جهدهم وسعيهم
احنا بقي هنا عاملين ايه اخبارنا ايه ...
احنا معندناش جواز الا لمن يمتلك مصاريف الشقه والشبكه والمهر او الجهاز ...وبعدين
نفضل متعطلين بالعشر سنيين لحد ما طالب الجامعه يخلص ويكون نفسه، مش اقل من عشر سنيين ان ماكانش اكتر...في الاثناء دي بيحصل ايه.. بنعطل الاحتياجات والرغبات و القدرات الشبابيه عشان ربطنا بطريقه او بأخري بين حق الانسان في ممارسة العلاقه وبين اللي معاه فلوس . فبقي اللي يقدر.. يمارس.. و(اللي معهوش مايلزموش) ...ونرجع ندفن راسنا في الرمل ونقول احنا معندناش مشاكل( ومن لم يستطع الباءه فليصوم) ...هتصوموا الناس ١٠ سنيين ولا اكتر ..لايمكن ده يكون حل ..ولايمكن العبء اللي علي الاهل ده في تجهيز اولادهم وبناتهم يكون عدل.. النموذج الغربي مفيش احسن منه.. بس مشكلتنا احنا شرقيين ومينعش معانا العلاقات اللي ملهاش ورق دي، واللي في نظرنا حرام، طب ازاي نخليها حلال وتناسب النموذج الغربي ؟؟
مفيش قدامي الا الزواج المشروط ...نعمل زواج مدني بشروط الدوله والطرفين المقدمين علي الزواج يكون اهم بنوده مفيش انجاب قبل ٥ او تلت سنيين..
ومن قبلهم تكون الدولة فتحت الباب القانوني للاجهاض
الاثنين اللي بيحبوا بعض يقدروا اول ما يتخرجوا بأمكانياتهم البسيطه وشغلهم مع بعض يكونوا نفسهم ويكبروا سوا ، ويكبروا حياتهم ...والاهم يكونوا متاكدين انهم عايزين يكملوا مع بعض، مش عايشين مع بعض مضطرين بسبب العفش او الشقه او الاولاد ولا اهي جوازه والسلام عشان البنت سنها كبر.. ولا نقول للشاب اللي (معهوش مايلزموش) ..و(الراجل مايعبوش الا جيبه) ...وكلهم يا حرام ماعهمش طيب في أكيد حد هيقول هو اللي مش معاه يجهز يعرف يصرف علي بيت ..ايوه ممكن مايكونش معاك مليون او نص مليون تجهز بيهم بيت بس معاك مصاريف المعيشه نفسها
طب هنستفيد ايه من الزواج ده .. هنستفيد تقليل العنوسه.. هنستفيد توفير فرصه عادله للشباب انهم يمارسوا حياتهم الطبيعيه بشكل شرعي قانوني من غير الوقوع في الاخطاء.. هنستفيد رفع الاعباء الرهيبه عن كاهل الاهل، اللي بقوا مطالبين انهم يجهزوا اولادهم وبناتهم وعايشين في دوامات متلاحقه من الصرف و الديون والاقساط ...بعد كل ده ممكن الفكره دي تنجح؟؟ ..معرفش!! هي عايزه مشاركه في حوار مجتمعي، تشريعات قويه ، دراسه من كل النواحي ، شغل من علماء نفس ، اجتماع ، و قانون
لكن اللي اعرفه ان الجواز ايام الرسول كان سهل واحنا اللي صعبناها علي نفسنا ..وكمان اللي اعرفه ان قانون الايجار الجديد كان موضه، بنقول محدش هيعترف بيه ولا هيتعامل معاه ..لكن دلوقت بقي واقع و أسر كتير عايشه في شرعيته ..احنا بنتجاهل عن عمد فكره احتياج الانسان للجنس، زي احتياجه للاكل، ونتصور ان الجنس ده شيئ متدني وممكن الصبر عليه الي الابد.. محدش هيعيش صايم، ولا حد هيبطل احتياجاته الاساسيه حتي لو المحيط كله نفي الاحتياج ده او رفضه
فمن باب الحق والشجاعه اعترفوا ان فيه مشكله وكبيره وعايزه حل من خارج الصندوق