ده كاتب أمريكي غلبان من مدينة صغيرة في تكساس اسمه شون وارنر ... طبع الكتاب بالعافية وشاهده تيك توكر شهير اسمه جيرارد سيرينجين وهو قاعد في مكتبة صغيرة وظاهر عليه البؤس لأن ماحدش مهتم بيه ولا بكتابه
فالتيك توكر راح له وبدأ يسأله عن كتابه ... والراجل وشه نور لما شاف حد مهتم به قليلا بدل ماهو قاعد بيهش ذباب ... شعر إنه عايز يساعده ... فاشتري منه كتاب واستأذنه يوقعه والتيك توكر حايقدم الكتاب ده هدية لأحد متابعينه ... وحايعمل له دعاية مجانية على حسابه ... فالكاتب الغلبان وافق وقال مش حخسر حاجة
وبالفعل التيك توكر اللي اسمه على حسابه على تيك توك internetfamouslol
نزل صورة الراجل وهو قاعد تعيس ونزل فيديو لحواره مع الكاتب وطلب أبناء بلدته بمساعدة الرجل بشراء كتابه ... وفجأة البوست بقى فيرال وعمل ١٧ مليون مشاهدة و ٣ مليون لايك و٢٢ الف كومنت ... وفي يوم وليلة ... الكتاب تصدر قائمة الأكثر مبيعا في أمريكا ... وحياة الكاتب اتقلبت بحركة لطيفة من شخص مايعرفوش من كائن بائس محلي الى شخص مشهور وكتابه متصدر المبيعات والفلوس بدأت تجري في ايده
قصة انسانية حلوة بس بتقول لك لا تيأس أبدا من رحمة الله وكرمه ... فممكن شخص ماتعرفوش يكون سبب في سعادتك ... بل وسعادة اسرتك بأكملها ... وبصراحة فرحت له جدا
موضوع: صحيفة نبض الشعب الاسبوعيه رئيس التحرير جعفر الخابوري 
الثلاثاء أغسطس 08, 2023 1:24 pm