صحيفة جعفر الخابوري الاسبوعيه رئيس التحرير جعفر الخابوري

مقلب فريد شوقي

فريد شوقي من ضغره، كان بيقرا الروايات، اللي فيها البطل بينقذ حبيته من الشخص الشرير، فالبطلة تديله بوسة، ويعيش الجميع في سعادة..

والراجل كان عايش على الحلم دا.. انه يحب واحدة والشرير يضايقها فهو يضربه وياخد البوسة..

وهو لسه في بدايات مراهقته، كان ماشي في الحلمية، والدنيا ضلمة، فسمع صوت ست بتستغيث، ايه دا.. دا باينها ساعة سعدك يا فري.. يلا يا واد خش انقذها.. قعد يدور عل مصدر الصوت... لحد ما وصله.. وراج كاسر باب الشقة. ولقى ست في الدور الاول.. بتتضرب من شخص عملاق..

وفيه ناس بيحاولوا يخلصوها من إيديه.. لكنهم مش قادرين.. فدخل فريد مسك في الراجل وقاله: "سيبها يا جدع".. فالست والناس كلها بصوا على فريد الشهم دا اللي مش هامه حد..

لكن الراجل قاله: "انت مين وعايز إيه؟، وبقية الناس قالوله"أنت إيه اللي حشرك واحد بيضرب الست بتاعته وأنت مالك؟"..

فريد مهتمش بكل دا.. هو راجل قاري روايات.. وعارف هو عايز ايه كويس.. فراح للست طبطب عليه.. وقالها معلش انا هخلصك منه، فالست وهي منهارة قالتله: " أنت مين وايه دخلك أنت؟"..

يا دوب فريد هيفوق من الصدمة، لقى جوزها والجيران كلوه علقة موت، وفين وفين لما حد من الجيران عرفه وخلصه من تحت إيديهم..

خرج فريد من تحت إيديهم خلصان وواكل ضرب لما شبع، وعرف ساعتها انك مش لازم تصدق كلام الروايات، وبقى هو اللي بيلعب دور الشرير اللي بيضرب البطلة..

#بهاء_حجازي