صحيفة نبض الشعب الاسبوعيه رئيس التحرير جعفر الخابوري

مين زكي جمعه ؟
لما دخلت كلية الزراعة أول ما دخلت مسألتش فين السكشن بتاعي ، لا قلت فين فريق التمثيل ، رحت لقيت رئيس فريق التمثيل شاب جميل جدا وعظيم بيعملي امتحان قالي "احنا هنعمل رواية من الأدب العالمي اسمها النورس بتاعة أنطون تشيخوف" ، قلتله "اه طبعا عارفه" وطبعا انا لا عارفه ولا حاجة ، فهو قالي "لأ انت مش عارفه" وبدأ يعرفني على أعماله وعلى الأدب العالمي عموما وقعدنا نهتم بالمسرحية ونشتغل عليها .. بعد فترة قالي "انت ممثل رائع وجيد وفيك موهبة كويسة جدا بس لازم تهتم بالمزيكا الكلاسيك" ، وفعلا بقيت اروح انا وهو نسمع مزيكا كلاسيك كان زمان في جامعة القاهرة بييجي أوركسترا القاهرة السيمفوني وكنا بنسمع فيها مزيكا كلاسيك كانت بـ 5 ساغ وساعات كانت ببلاش .. وفي نهاية السنة قالي "انا السنة دي في سنة ثالثة والسنة الجاية هكون في البكالوريوس وانت هتبقى رئيس فريق التمثيل بعدي" .. هذا الشاب كان له تأثير كبير جدا في عادل امام وهذا الشاب لو تذكروا في "مدرسة المشاغبين" حينما قلت :"رفاعة الطهطاوي وقاسم أمين وعلي مبارك وزكي جمعة ، مين زكي جمعة ده ؟؟" أهو زكي جمعة ده هو الشاب اللي انا بحكيلكم عنه وهو حاليا أستاذ في جامعة الزقازيق وهو موجود معانا هنا ياريت يتفضل على المسرح عشان تشوفوا وتعرفوا مين زكي جمعة ده
منقول وبتصرف