صحيفة نبض الشعب الاسبوعيه رئيس التحرير جعفر الخابوري

مين ريا وسكينة ؟؟
الكاتب الصحفي صلاح عيس كتب كتاب عظيم اسمه "رجال ريا وسكينة" الكتاب حوالي الف صفحة فيه كم تفاصيل رهيبة عن ريا وسكينة.. وموجود على النت للي حابب يقرا .. صلاح عيسى تقريبا خد اجازة وفضل يدور ورا ريا وسكينة وهو افضل من كتب عن ريا وسكينة.

المهم مين قرر ياخد الكتاب ويعمله مسلسل .. اتنين .. محمد خان رحمة الله عليه مخرجا.. ومحمد ناصر مذيع قناة مكلمين والشرق مؤلفا.. خان وناصر كانوا اصحاب.. واشتغلوا مع بعض فيلم اسمه كليفتي .. مشافتوش ومش عارف ايه قصته.. راحوا لصلاح عيسي.. قالهم .. ماشي بس انتوا قدامكم شهر لو متعملش السيناريو هسحب منكم القصة .. دفعوا العربون وراحوا وجم .. معملوش غير 16 حلقة تقريبا.. ودا رقم ضخم يعكس مجهود جبار في شهر.. كان ساعتها صلاح عيسى اصلا اتعاقد مع مصطفى محرم على المسلسل.
مصطفى محرم اشتغل على المسلسل .. بس قبل ما يكتب حرف.. كان متعاقد على بطلاته مين بقى .. سمية الخشاب وعبلة كامل .. برافو عليك اجابة خطأ طبعا..

المسلسل اتعمل اصلا.. لنادية الجندي ونبيلة عبيد .. الاتنين واحدة نجمة مصر الاولى والتانية نجمة الجماهير والاتنين اشتغلوا قط وفار سوا لما تعبوا.. يعني مثلا نادية اتهمت نبيلة انها وراء منع عرض فيلمها 5 باب .. ونبيلة كانت بتقول ان نادية بتطفش الجمهور من افلامها..

وكانت فيه حركة خبيثة نميسة بتتعمل ساعتها .. ازاي .. مثلا نادية تبعت حد يشتري كل تذاكر السينما بتاعت فيلم نبيلة .. وبعد كدا محدش يروح طبعا... وتبعت صحفي يصور السينما فاضية ويقول ان محدش شاف فيلم نبيلة .. وهكذا..

طيب ما نجيب الاتنين سوا ونعمل بيهم ريا وسكينة.. فكرة حلوة.. مين هيخرج .. دراما يعني مجدي ابو عميرة طبعا.. تعالي يا عم مجدي .. اكتب يا عم مصطفى .. يلا يا نادية .. هوبا يا نبيلة .. فضلوا شوية شغالين .. وعايزة اقولك ان كل واحد كان بيعمل 12 تصريح في الساعة كأنهم هيخلصوا المسلسل وينزلوا يترشحوا للرئاسة.. فجأة نادية الجندي قررت تضرب كرسي في الكلوب وتسيب المسلسل .. ليه يا مدام نادية ؟

قالت تصريح غريب جدا.. المسلسل فيه كم عنف انا مش معتادة عليه ودا هيأثر على تاريخي.. والحقيقة دا تصريح غريب .. لان الفنانة نادية الجندي افلامها كلها دم.. يعني الفيلم اللي مبتتعورش فيه انا بزعل اصلا.. ثانيا يعني مسلسل عن ريا وسكينة انتي متوقعة يكون بيتصور في كوكي بارك مثلا... المهم مشيت.

الاستاذ مجدي ابو عميرة كان لسه شغال مع فيفى عبده في الحقيقة والسراب فقالهم ايه رايكم نجيب فيفي عبده ويبقى فيفي عبده ونبيلة.. نبيلة قالت لا طبعا ازاي تقولوا كده.. وراحت سايبة المسلسل .. وسبحان الله بعدها هتروح تشتغل مع فيفي في كيد النسا 2.. من تأليف ابن مصطفى محرم الوحيد... حسين.. فرد انت يا حسين بقى.

نرجع مرجوعنا ونطلع مطلوعنا.. مجدي ابو عميرة لقى نبيلة اعتذرت .. ونادية قبلها اعتذرت .. قالك يعني هما اجدع مني طلاق تلاتة ما انا شغال وراح اعتذر عن المسلسل .. مدينة الانتاج الاعلامي اللي بتنتج المسلسل قالت يعني لا فيه مخرج ولا ممثلين .. انا بقى قاعدة بنتج ايه .. انا كمان سوري .. وراحت معتذرة .. كدا مش فاضل غير مصطفى محرم .. لا معتذرش.. كمل .. وجاب المخرج جمال عبد الحميد .. اللي رشح عبلة كامل وسمية الخشاب.. وراحت مدينة الانتاج رجعت.. واتعمل مسلسل من افضل اعمال كل اللي شاركوا فيه.

#بهاء_حجازي
#بهاء_حجازي_والمسلسلات
##ريا_وسكينة