صحيفة نبض الشعب الاسبوعيه رئيس التحرير جعفر الخابوري

=انا لما اتجوزت.. مكنش معايا فلوس. كان معايا ٧ جنيه
- إتجوزت بـ ٧ جنيه..؟

= لا دول. كانوا معايا وقت ما إتجوزت..، اصل هما جابوا العفش وانا جبتلهم المهر،، وربنا كرمنا وجالنا ١٨ جنيه صباحية

- نقطة يعني..!

= اها.. روحت كفر الشيخ قولت يمكن ربنا يرزقني بيهم وربنا أكرمني وجبت بيعة وانا مش معايا فلوس ونزلت بيعتها
- يعني خدت البيعة بالقسط..؟

= لا دا كان راجل حبيبي.. خدتها وكان تمنها ٤٠٠ جنيه،، وربنا أكرمني وبيعتها بـ ١١٠٠ جنيه

- اها دانت اتنقلت ناقلة تانية بقا.. دا وش العروسة

= فعلاً،، وروحت اديت الراجل فلوسه راح مديني بيعة كمان روحت بيعها بردوا بـ ١١٠٠ جنيه. وقولت دا رضا اوي بقا
روحت وانا ماشي .. دخلت علي الصاغة.. منا مجبلتهاش حاجة وقت ما اتجوزنا .. روحت جايبلها جوز تعابين وخمس أجواز غوايش وخاتم وحلق ومكنش فيه علب وقتها.. كنا بنحطهم في كيس كدا وعديت جبت تمن كيلو جبنة رومي وتمن كيلو جبنة بيضاء.. وبعد ما اتعيشنا قولتلها قومي شوفي الحاجة ديه
قالتلي.. اله! دول قشرة قولتها لا دول دهب.. قالتلي هو انت معاك حاجة أصلاً
قولتها لا.. بس ربنا أكرمني علي وشك الحلو
الحاج نادي السباعي..
صاحب شخصية عبد الغفور البرعي
___________
تعقيب من الصفحة:
الراجل ده اصله طيب وخلقه الكرم والعطاء
ممكن شخص تاني كان خبى على زوجته الفلوس ومفكرش يكرمها اول ما ربنا كرمه !! اصل هي هتعرف منين بدليل ان زوجته قالت دول قشرة؟! كان ممكن يجيب فعلا قشرة او فعلا ميجبش اصل كفاية اجيبلها اكل !!
الاجمل من الدهب اللي جابه شعوره بان ده وش العروسة الحلو وفضل طول عمره معاها قناعته من جواه ان ربنا كرمه بسببها و فضلت في قلبه ليها وكل ماكان ربنا يكرمه كان يجبلها تاني وتالت مقالش كفايه انا جبتلها .. الكرم بينبع من القلوب النضيفه الصح اللي تحب تعطي من قلبها مش تفضل ولا منة على الزوجة!! الواحد شكله عايز يكتب روايه جديده في الموضوع ده لانه مهم وضروري في مجتمعنا اللي بيعتبر المرأة اداة للخلفة فقط او عامل في البيت بدون حتى أجر .

#شخصيات
#عبدالغفور_البرعي
#مسلسلات
#محمود_سعد
#مصروناسها