صحيفة نبض الشعب الاسبوعيه رئيس التحرير جعفر الخابوري

المخرج عاطف سالم وهو بيحضر لفيلم "جعلونى مجر*ما" كان عايز يعمل تجربة واقعية وعلشان كده قال أنا هنزل أصور فى الشارع بدل الاستوديوهات..وياريته ما نزل..

فى يوم من الايام يا سادة يا كرام .. نزل عاطف سالم شارع قصر النيل ومعاه المصور قبل شروق الشمس علشان يصور الناس اللى بتنام على الرصيف..

الجو زى ما قال عبدالباسط حمودة كان هادي خالص والدنيا زى ماقال عبدالباسط برضة كانت هس هس .. وعلشان كده بدأ عاطف سالم يصور بمنتهى الأريحية لحد ما الشمس طلعت وبدأ يهل على الشارع ناس على كل شكل ولون.. ومن بينهم برز راجل طول بعرض.. لا هو مش طول بعرض عادي.. هو طولين بعرضين.. "عملاق" زى ما وصفه عم عاطف.. وهوب وقف قدام الكاميرا سدها وقال لعاطف سالم : "جري ايه يا خواجة.. حيلك؟".

وهنا عاطف سالم ابتسم وقاله : "يا حبيبى انا مش خواجة.. انا اسمى عاطف سالم يعنى مصرى زيك .. وبعدين انت متملكش تقولي حيلك.. انا واخد تصريح رسمي من الحكومة انى اصور هنا".. فلقى الراجل بيقوله : "بس مش معقول الحكومة تصرح لك انك تصور الناس الغلابة وتف*ضح بيهم مصر فى بلاد برة.. سيبك يا خواجة من الحيل دى.. مش علي انا" ..

وهنا اتنرفز عم عاطف وقاله : "طيب .. من فضلك اوعى متعطلناش".. فرد الراجل وقال : "اوعي ازاى؟.. ده نهارك نهار.. لم عدتك ويالا بينا على القسم"..
وهنا جه عسكر*ي يجري يشوف ايه اللى بيحصل.. وحاول يفهم اخينا ان ده مخرج وبيصور مشاهد لفيلمه .. لكن الراجل ما اقتنعش فعم عاطف راح لأقرب تليفون واتصل بقسم الشرطة وقالهم ان فى شوية من بلدياتنا اتلموا عليهم وهما بيصوروا وبيضربوا فى العسكر*ي لما حاول يفرقهم .. وطبعا الرواية دى مكنتش صحيحة .. بس هو قال كده علشان يكبر الموضوع والبوليس يهتم..

وفعلا تحمس البوليس.. وبعت 30 عسكر*ي نزل واحد منهم بالعصاية على العملاق اياه اللى كان معصلج مع عم عاطف.. وفجأة انشقت الارض وطلع منها عدد كبير من اخواته وبدأت عركة حامية بينهم وبين العسا*كر نتج عنها .. عدد كبير من الجر*حي.. وكاميرا متدغدغة خمسين حته..
وزى ما قولنا قبل كده "الواقعية صابتنى ورب العرش نجاني"..
#الحكواتي_الهامي_سمير
#إلهامي_سمير