صحيفة نبض الشعب الاسبوعيه رئيس التحرير جعفر الخابوري

نجوم يؤمنون بالتنجيم

فى عدد من أعداد مجلة الكواكب عملت تحقيق عن النجوم اللى بيؤمنوا بالتنجيم.. وكان ابرزهم يوسف وهبى.. واللى قالت المجلة انه فى مرة كان رايح مع فرقته يعرضوا فى المنصورة .. وهناك واحد من الاعيان قاله "هجيب لك شيخ وقور ..ربنا كشف الغيب عن قلبة وممكن يقرا لك الطالع ويقولك ايه اللى هيحصلك"..

وجه الراجل ومسك كف يوسف وهبي وقاله "سينعم عليك برتبة.. وستصبح ثروتك مكونة من 6 أصفار" .. وقتها ضحك يوسف وهبي وهو بيقول فى سره "كذب المنجون ولو صدفوا" وبعدها بخمس سنين عم يوسف خد رتبة البكوية وبقت ثروته نص مليون جنيه..

اما جورج ابيض فقال انه لما كان شغال ناظر محطة سيدى جابر كان شغال معاه وكيل محطة "من الصالحين".. ورغم ان جورج كان مخبى موضوع انه بيمثل على الناس اللى فى المحطة الا ان الوكيل ده قراله فى مرة الفنجان وقاله "انك تتمنى أن تكون ممثلا وأمنيتك هذه لن يحققها لك الا الخديو.. فابذل جهودك لمقابلته لأنه سيساعدك على السفر الى باريس لتعلم التمثيل هناك وستنال شهرة عظيمة باشتغالك بالتمثيل".. وبعد اربع سنين كان جورج ابيض بيدرس التمثيل فى فرنسا على نفقة الخديو..

المجلة قالت كمان ان الانسة ام كلثوم كانت بتستطلع مستقبلها عند ست سودانية نبغت فى قراية الكف والفنجان .. وان الست دى تنبأت لها بحاجات كتير وحصلت.. وام كلثوم كانت سخية معاها سخاء ملفت للنظر..

اما نجيب الريحانى فكان بيتردد زى ما بتقول المجلة على رجل احترف قراية الكف وكشف الطالع.. وكان بيحترم كلامه ويثق فيه.. لأبعد حد .. لدرجة انه لما اتصاب بامراض القلب والدكاترة نصحوه بالاعتكاف وعدم مزاولة المهنة زاره الشيك وضحك من نصايح الدكاترة وقال للريحانى انه مش هيموت بالقلب.. وقبل ما يسافر الريحانى مع فرقته اسكندرية الرحلة الأخيرة اللى انتهت باصابته بالتيفود اللى مات بيه.. راح زار الشيخ اياه ومالقهوش.. وسافر وهو بيقول "انا خايف من الرحلة دى"..
#الحكواتي_الهامي_سمير
#إلهامي_سمير