صحيفة نبض الشعب الاسبوعيه رئيس التحرير جعفر الخابوري

حكاية اغنية عاشق الروح .. وبطلتها الحقيقية

الشاعر الكبير حسين السيد كان شاهد على قصة حقيقية لست جميلة جوزها مات وسابها لوحدها.. فالمقربين منها نصحوها بانها تنزل تشتغل بدل ما تفضل قاعدة فى البيت.. علشان تقدر تتجاوز أحزانها.. وفى نفس الوقت تشغل وقتها..

وفعلا الست سمعت الكلام ونزلت اشتغلت فى شركة .. وبدأت أول المشوار سكرتيرة لكن بعد فترة وبفضل ذكائها ومجهودها بقت هى الكل فى الكل .. وفى يوم من الايام يا سادة يا كرام بدأت قصة حب بينها وبين مدير الشركة اللى قالها أنه بيحبها فعلا.. ولما جه وقت الجد رفض يتجوزها بسبب فرق المستوى الاجتماعي بينهم..

مرت الايام وبدأ يتقدم لها ناس كتير وترفضهم.. حتى لما مدير الشركة حب يتقدم لها رفضت.. فجه يوم وحسين السيد سألها.. "ليه رفضتى أنك تتجوزيه ؟" فقالت : "يكفى ان روحى تحب روحه.. هذا هو الشيء الخالد الوحيد فى حياتنا" .. فقالها "طيب ليه ما تتجوزيش غيره ؟" فقالت له : "علشان مش عايزة اسبب له جرح.. وعموما كفاية انه روحه بتحب روحي ولا هى الدنيا مفيش فيها غير جشع الشهوة وحقارة الماديات"..

سابها حسين السيد ومشي والكلام بيرن فى ودنه.. وراح يقابل الاستاذ عبدالوهاب اللى كان بيجهز وقتها للمشاركة فى فيلم "غزل البنات".. وكان متفق مع انور وجدي ان ظهوره هيبقى بمجرد أغنية يقدمها وبس..

فى اول المقابلة قاله عبدالوهاب انه بعت لشاعر لبنانى علشان يكتب له قصيدة يغنيها في الفيلم.. وهنا دخل انور وجدي وبدا يشرح لعبدالوهاب طبيعة المشهد اللي هتتعمل علشانه الاغنية .. وانه بيدور حوالين راجل كبير بيحب بنت صغيرة حب الروح للروح..

سمع حسين السيد جملة أنور وجدي .. وربطها باللى الست قالته .. ورجع جري البيت وبدا يكتب من وحى الموقف كلمات الاغنية اللي سماها عاشق الروح.. وبعد 3 ايام الاغنية كانت جاهزة فراح بيها الاستوديو.. ودخل لقى عبدالوهاب بيلحن فى القصيدة اللى كتبها الشاعر اللبناني.. فعم حسين حس انها مش مناسبة للموقف.. وهنا قرر أنه يعلن عن كنزه الثمين .. وطلع الورق من جيبه وقاله "اسمع يا استاذ الاغنية دى".. وبدأ يسمعهاله هو وأنور وجدي.. وبعد ما خلص لقى انور بيقف على حيله وهو بيقول : "هو ده المطلوب"..وخطف الاغنية من ايد حسين واداها لعبد الوهاب وهو بيقوله "عوضك على الله فى تمن القصيدة اللى دفعتها..ومجهود التلحين".. وفى اليوم ده خرج حسين وعبدالوهاب الى بيت الاخير فى حلوان عشان يتغدوا مع بعض .. وبينما هم فى الطريق كان عبدالوهاب لحن مقدمة الاغنية..
#الحكواتي_الهامي_سمير
#الهامي_سمير