صحيفة نبض الشعب الاسبوعيه رئيس التحرير جعفر الخابوري

فى ذكراه..
محمد عوض كان له جماعة قرايبة متعود يروح يزورهم من فترة للتانية .. وفجأة انقطع عن الزيارة لانه وقتها كان مشغول بتصوير مسلسل "برج الحظ" اللى كان بيعمل فيه شخصية شرارة اللى كل الناس بتقول عليه نحس ..

المهم انه فى الفترة دى كان فيه ميكانيكى فاتح ورشته فى البيت المقابل لبيت قرايب عوض وكان بيروح يسأل عنه يوماتي.. وكل ما يروح يقولهم "هو الأستاذ مش هيجي يزوركم قريب ؟" فيقولوا "والله مش عارفين".. لحد ما فى يوم راح عوض يزور قرايبه.. وهو بيرن الجرس فجأة سمع صوت خبطة جامدة أوي.. فخرج يشوف إيه اللى حصل واكتشف أن سقف بلكونة فى الدور التانى وقعت على عربية كانت واقفة بتتصلح فى ورشة الميكانيكى اياه..

طبعا الناس كلها خرجت تشوف ايه اللى حصل .. وكله بقى يسأل "العربية كان فيها حد ولا لا ؟".. لكن الميكانيكى ساب ده كله وفضل يضحك.. وطبعا محدش فاهم بيضحك ليه.. ولما عوض رجع لقرايبه وسأل عن رد فعل الميكانيكي اللى المفروض هيدفع تمن العربية اللى اتطربقت بما انها فى عهدته.. قالوا له "ده كان بيسأل عنك كتير الفترة اللى فاتت"..

طبعا الفضول كان هيموت الكل .. وعلشان كده كله كان بيسأل الميكانيكي عن رد فعله غير المتوقع .. فقالهم "بصراحة البلكونة دى آيلة للسقوط وكان المفروض تقع من بدري ..وكنت مستنى الاستاذ شرارة يجي يزوركم عشان اول ما يجي تقع ونخلص .. بدل ما احنا مستنين وقوعها من يوم للتانى.. والحمد لله اول ما جه حصل المراد من رب العباد والبلكونة وقعت"..

الافيه بقى انهم لما نقلوا لعوض الكلام ده فضل قاعد عندهم مستخبى.. ومرضيش يروح الا لما الشارع كله ضلم والناس كلها روحت بيوتها واتطمن ان الميكانيكى قفل الورشة..
#الحكواتي_الهامي_سمير
#الهامي_سمير