صحيفة نبض الشعب الاسبوعيه رئيس التحرير جعفر الخابوري

ف فيلم زهايمر
سعيد صالح قال لعادل إمام ابقى اسأل عليا يا محمود، متعملش زيهم وتروح وتنساني !!

1-بنت بتحكي بتقولي إنها مرة سافرت من سوهاج نزلت اسكندرية عشان تحضر فرح ابن عمها.. بتقولي يوم الفرح كنت نايمة لوحدي ف شقتنا صحيت من النوم لقيت البيت فاضي و ولاد عمي اللي سافرتلهم يجي 10ساعات مشيوا وسابوني ولما كلمتهم اشوف فيه ايه قالولي "نسينا" البسي و هنتصرف نبعت حد ياخدك دلوقتي...

2- شاب بيحكي بيقول عمي كان مسافر و كنت دايمًا بكلمه و اطمن عليه و كده و لما جه لقيته جايب هدايا لاخواتي كلهم و لما شافني قالي ايه ده انا ازاي "نسيت" و نزل بعدها اشترالي حجات زيهم و اكتر بس بعد ايه؟ بعد ما نسي :")

3- بنت بتحكي بتقول كان فرح صاحبتنا و كانت علاقتي بيها كويسه جدًا المهم دخلت أباركلها ف الشات و كده لقيتها بتقولي.. أسفة أنا "نسيت" اجبلك كارت دعوة الفرح بس انتي كده كده جايه .. و عرفت بعدها انها بعتت كروت لكل صحابنا تقريبا و نسيتني :")

4-بنت بتحكي بتقول كان عيد ميلادي و كنت قافلة الميديا و كده و صاحبتي الأنتيم و أقرب واحدة ليا مقالتليش حتى كل سنة و انتي طيبه و جت بعدها بكام يوم جيبالي هدايا و بتقولي معلش "نسيت"يومها خالص والله..

5-بنت بتحكي بتقول كنت بعتبرهم أصحابي و بحبهم خالص بس ف مره بقولهم عاوزين نبقا ننزل نشوف بعض قالولي احنا نزلنا اول امبارح بس "نسينا" نكلمك...
6-كانت حصه مهمه 6 الصبح و اتفقنا نصحي بعض... قومت لقيت الساعه 8 فاتصلت بيهم عشان نضحك على نفسنا و كده بس لقيتهم بيقولولي اقفل احنا ف الحصه معلش "نسينا" نكلمك الصبح....

7-شاب بيحكي بيقول مكانش ليا غيرهم و معتبرهم أكتر من اخواتي و هما برضو كانو موصلينلي كده لحد ف مره ما لقيتهم رافعين صوره هما الاربعه ف اسكندريه و لما عملت كومنت قالولي والله لو كنا افتكرنا كنا قولنالك جيت معانا...

8-شاب بيحكي بيقول كنت رايح عند جدي بالصدفه لقيت كل ولاد خوالي و خالاتي هناك فطبعا انبسطت جدًا و كنت فرحان بيهم لحد ما قالولي احنا متفقين م الاسبوع اللي فات بس"نسينا" نقولك..

9- شاب بيحكي بيقول مره كنت غايب انا و شلتي بس واحد مننا راح عشان كان عنده سيكشن مهم، سمع عن رحله جامده فراح حجز ليهم هما التلاته و" نسيوني

* كام مره عيطت بسبب حاجه تافهه بس انت مكنتش بتعيط بسبب الحاجه دي، انت بتعيط عشان "نسيوك"
احساس انك منسي احساس صعب جداً بيكرهك ف نفسك و بيعيشك حاله غريبه جداً من الندم على انك اتعشمت فيهم اصلاً
، هما نسيوني ليه؟!
هما نسيوني ليه و حطوا كل حاجه قبلي مع اني دايماً حاططهم ف الأول و عمري ما نسيتهم !!