صحيفة نبض الشعب الاسبوعيه رئيس التحرير جعفر الخابوري

صورة لسيدات مصر زمان شايفين صورهم تفرح القلب ازاي في الاناقه والذوق والشياكه .،
سيدات مصر زمان ..

اللي ربونا و علمونا و هذبونا…

علمونا نتكلم ازاي و نقول "من فضلك "و "حضرتك " و لو سمحت..اللي علمونا نقول متأسف لو غلط..
اللي علمونا نقف للكبير دول اللي كانوا يذهبوا معنا النادي يوم الجمعه ويجلسوا قدامنا يحرسونا و يلاحظونا و احنا بنلعب..

اللي جلسوا جنبنا و احنا بناكل و فهمونا ازاي نمسك الشوكه و السكينه و عيب تتكلم و الاكل في بقك..
و اقفل بقك و انت بتمضغ الاكل..

دول اللي رفضوا مضغ اللبان في الشارع ..
و الجلوس علي القهاوي ..

و متعملش صوت و انت بتشرب الميه..
و امسح بقك بالفوطه

دول اللي فهمونا عيب ترمي حاجه في الشارع ..
اللي قالوا لنا ان ده شارعنا .. مش شارع الحكومة..

اللي وصلونا لباب الجامع والكنيسة ..
اللي حفظونا : قم للمعلم وفًه التبجيلا …

قالولنا عيب تتكلم في التليفون من الساعة ٢،٣٠ للساعة ٥ لانها وقت راحة..
ومايصحش تطلب حد بعد الساعة ١٠ بالليل..

علمونا نضرب جرس واحد ، ونقف بعيد ..
علمونا نقول نعم او افندم وان " ايه "دي عيب !!

عاقبونا لو قلنا : نيلة !!
وحرمونا من الخروج لو سمعوا "يا خرابي"!!!

عرفونا ان الأناقة ليست ابتذال،

علمونا كيف نلبس من محلين تلاتة …
وكيف نسعد بخروجة في الاسبوع …

علمونا الرضا والقناعة …
وأن التهور غير الشجاعة ..

عرفونا العيب …. وسابونا نعرف الحرام
جابوا كتب وروايات … ومصحف وانجيل!!.
وفهموا دينهم.. ووروهلنا في تصرفاتهم…

قدروا الجمال والذوق …..
فتمعتنا ببلد جميل راقي !!

رفضوا القبح بكل صوره….
فأبينا سماعه ورؤيته ….

علمونا ان لا نتدخل في خصوصيات …
لا في حياة ولا منازل ولا أديان الناس …

علمونا المجاملات بالقول والفعل والبسمة عند اللقاء…
زرعوا فينا الطيبة والخير والتبرع "لمعونة الشتاء "

أحبوا الزهور ، وزرعوها…
وأشتروها ليعطروا السيارات والمعاصم والصدور…

دول اللي حببونا في الست وفيروز ..
،
وبعتونا بطبق الكحك لجيراننا يوم العيد !

دول ستات مصر اللي كانول بيذاكروا لنا ، و مفيش دروس خصوصي و لا سنتر تعليمي
دول اللي كانوا بيدبروا مصاريف البيت و المدارس و الهدوم و المصيف..

دول اللي في زمن الرخص رفضوا البذخ ….
وفي زمن صعوبة التواصل، كانوا حريصين علي تواصلنا بأهلنا ….

دول اللي كانوا بيطبخوا اطعم اكل
و لا كان في سوبر ماركت و لا كارفور
ستات مصر..
بس خلاص ..
مفيش كلام تاني يتقال..

سيدات مصر اللي ربوا هذا الجيل .وانا أدين لهم بالكثير …ومصر راح منها كتير قوي لما راحت ستات مصر الفُضليات !!!

تحياتي سيداتي … (منقول)

#الكاتب_رامى_رجائي